Ծառուկյանը չառաջադրվեց: Մարեց առաջիկա նախագահական ընտրությունների ինտրիգը՝ իր հետ մարելով անիմաստ հրապարակ նետված քաղաքական բանավեճը: Տեղի ունեցավ խիստ սպասելի իրադարձություն՝ Ծառուկյանը ֆինանսական կապիտալը գերադասեց քաղաքական կապիտալից: Բաձինա Իվանիշվիլու հայկական կերպարի ճարտարապետները շատ ուշ հասկացան, որ, ի տարբերություն Ծառուկյանի, Իվանիշվիլիի կապիտալը սերտաճած չէր Սահակաշվիլիի ռեժիմի հետ, հետևաբար կերակրատաշտին զսպող մեխանիզմներ չկային, որը նոր վրացական առաջնորդին թույլ տվեց իր կապիտալի մի մասը ներդնել քաղաքական բիզնեսում: Իսկ Հայաստանի դեպքում մենք ունենք կառույց, որը ընդգրկում է տարբեր տրամաչափի գործարարների, որոնք անխուսափելիորեն սնվում են նույն իշխանական աղբյուրներից: Պարզապես առաջադրման վերաբերյալ անթաքույց ակնարկները, այնուհետև չառաջադրվելու մասին հայտարարությունը ԲՀԿ-ի քաղաքական կապիտալը վերածեցին մանրադրամի: Խոշոր քաղաքական կառույցը մինչև հաջորդ խորհրդարանական ընտրություններ փնթփնթալով քարշ կտա իր գոյությունը, մինչև իշխանությունները կմտածեն նոր քաղաքական պրոյեկտ՝ իրենց նկատմամբ համեմատաբար լոյալ գործարար հատվածը խորհրդարանում տեղավորելու համար...